Монгол Улсад албаны болон хувийн зорилгоор оршин сууж байгаа гадаадын иргэд, жуулчид F-Register /бүртгэл/ ашиглан E-Mongolia.mn-ээс үйлчилгээ авах боломжтой боллоо. Тодруулбал, Гадаадын иргэний эрх зүйн байдлын тухай хуульд заасны дагуу Гадаадын иргэнд түүнийг харьяалах улсын товчлол, төрсөн он, сар, өдөр, хүйс зэрэг өгөгдлийг багтаасан хоорондоо давхцахгүй 13 оронтой бүртгэлийн дугаарыг Гадаадын иргэн, харьяатын газраас олгож эхэлсэн бөгөөд уг дугаарыг ашиглан E-mongolia.mn-д нэвтэрч, төрийн болон хувийн хэвшлийн бүх байгууллагуудаас үйлчилгээ авах эхлэл ийнхүү тавигдаж байна.

Гадаадын иргэн E-Mongolia.mn платформ дараах байдлаар нэвтрэх боломжтой. Үүнд:

1. 1. Нэг удаагийн кодоор буюу гадаадын иргэний дахин давтагдашгүй 13 орон бүхий бүртгэлийн дугаар
2. 2. Интернэт банкны эрх
3. 3. Тоон гарын үсгээр тус тус нэвтрэх боломжтой.

E-Mongolia.mn-ээс Гадаадын иргэн, харьяатын газрын дараах үйлчилгээнүүдийг авах боломжтой. Үүнд:

• Дахин давтагдашгүй 13 оронтой бүртгэлийн дугаар авах,
• Монгол улсын харьяатаас гарсан тухай тодорхойлолт,
• Монгол Улсын иргэний харьяаллаа сэргээн тогтоолгосон тухай тодорхойлолт,
• Гадаадын иргэний оршин суух зөвшөөрлийн хасалт хийсэн тодорхойлолт,
• Гадаадын иргэн оршин суух зөвшөөрөлтэй эсэх тухай лавлагаа,
• Гадаадын иргэн, уригчийн зөрчил гаргасан эсэх тухай тодорхойлолт,
• Гадаадын иргэний бүртгэл хийлгэх

E-Mongolia.mn платформд нэвтрэх бүртгэлийн дугаарыг гадаадын иргэний Монгол Улсын хилээр нэвтэрсэн бүртгэлд үндэслэн олгох ба гадаадын иргэн цахим шуудангаар  буюу гадаад паспортын зургаа support@immigration.gov.mn хаягаар илгээх, эсвэл төрийн үйлчилгээний нэгдсэн систем E-Mongolia аппликейшнийг ашиглан хялбар аргаар бүртгэлийн дугаараа авах боломжтой.